Materiais didácticos para o alumnado e profesorado de ASPABER

23 de decembro de 2022   -    Do sector

A Universidade de Santiago de Compostela (USC) e ASPABER unen forzas para a creación de materiais didácticos dirixidos a persoas con diversidade funcional asociadas a dificultades cognitivas.

A comezos do curso escolar 2022-2023 a USC e ASPABER coinciden na necesidade da posta en marcha dun proxecto de Aprendizaxe-Servizo (ApS) dada a escaseza de recursos educativos para traballar con alumnado con diversidade e a ausencia de cursos formativos para os profesionais que traballan neste sector.

Neste proxecto participou máis dun cento de alumnado universitario das seguintes tres materias:

• “Deseño e Elaboración de Materiais Didácticos” (4º curso do Grao en Mestre de Educación Infantil e Mestre de Educación Primaria)
• “Deseño e Avaliación de Materiais Didácticos” (4º curso do Grao en Pedagoxía)
• “Formación en Rede” (4º curso do Grao en Pedagoxía)

O alumnado da materia “Deseño e Avaliación de Materiais Didácticos” foi o artífice da elaboración de recursos pensados para o Centro Ocupacional de ASPABER. Algúns destes recursos son: xogos de mesa como o denominado Aspapoly, unha ruleta das emocións, simulación de espacios de uso cotiá, historias interactivas, blogs ou mesmo unha canle de receitas chamada Aspachef.

O alumnado de 4º curso de Pedagoxía da materia de “Formación en Rede”  foi o artífice da configuración dun Campus Virtual creado mediante a plataforma Canvas LMS, dirixido aos profesionais da asociación ASPABER.  Este mesmo alumnado, alimentou dita plataforma con dous cursos sobre Competencia Dixital: “Área de Información e alfabetización informacional” e “Área de seguridade”. Ademais, é interesante destacar que estes cursos conteñen actividades interactivas para poder avaliar os coñecementos aprendidos. A plataforma permanecerá aberta para crear e engadir os recursos que se consideren necesarios.

Polo tanto a principal finalidade deste ApS foi elaborar materiais didácticos dirixidos as/os usuarias/os de ASPABER e un Campus Virtual con cursos formativos e recursos dixitais dirixido as/os profesionais que traballan nesta Asociación. Atendendo así a todos os membros e necesidades actuais desta comunidade educativa.


O ACTO DA ENTREGA DE RECURSOS SERÁ O 22 DE DECEMBRO NO EDIFICIO DO FORUM (Praza dos Bombeiros Voluntarios s/n CARBALLO)  
----------------------------------------------------------------------------------------------------------------------------------------------------------------------------------------------------------------

• HORA: 10:30
• ACOMPAÑARANNOS: 58 alumnos dos grados de Mestre de Educacion Infantil, Mestre de Educación Primaria, grado en Pedagoxía.
• PROFESORES: Silvia López Gómez, Tania Caamaño Liñares, Ana Rodríguez Guimeráns, Jesús Rodríguez Rodríguez.
• PROFESIONAIS da Asociación ASPABER

Ligazóns

Imaxes